ნიკო სულხანიშვილი. დაიგვიანეს (მწყემსის არია) / ჰამლეტ გონაშვილი და სახელმწიფო ანსამბლი. 1961

ტექსტის ავტორი აკაკი წერეთელი

ასრულებს ქართული სიმღერისა და ცეკვის სახელმწიფო ანსამბლი.
სოლისტი ჰამლეტ გონაშვილი
1961 წლის ჩანაწერი
წყარო - საქართველოს ეროვნული არქივი.

სიმღერა, რომელიც ძალიან ბევრს ხალხური ჰგონია, სინამდვილეში ქართული საოპერო ხელოვნების შედევრია, რომელსაც ჰყავს კონკრეტული ავტორი.

ნიკო სულხანიშვილი. ოპერა "პატარა კახი". 5-მოქმედებიანი გმირულ-პატრიოტული ოპერა. ხელნაწერის უდიდესი ნაწილი დაკარგულია. შემორჩა მხოლოდ ორი ეპიზოდი. ერთ-ერთი მათგანი წინამდებარე არიაა.
ლიბრეტო დაიწერა აკაკი წერეთლის ხუთმოქმედებიანი ისტორიული დრამის "პატარა კახის' მიხედვით. ავტორი ნიკო სულხანიშვილი.
ოპერა იწერებოდა წლების მანძილზე, რადგან ავტორს დიდი მატერიალური გაჭირვება ჰქონდა და ვერ ახერხებდა ნაყოფიერად მუშაობას. ოპერის შექმნის საქმის კურსში იყო აკაკი წერეთელი, რომელიც დიდ მხარდაჭერას უცხადებდა კომპოზიტორს და რამდენჯერმე მოისმინა კიდეც ფრაგმენტები ამ ოპერიდან, თუმცა მგოსანი ისე წავიდა ამქვეყნიდან, ოპერის დასრულებას ვერ მოესწრო. საბოლოოდ, ოპერა დაიკარგა ისე, რომ მისი პრემიერა არ შემდგარა. მძიმედ ავადმყოფ კიკუშას, საავადმყოფოში მწოლარეს, ხელნაწერებით სავსე ჩემოდანი მოპარეს. ასეთია ამ ქმნილების ბედი, რომლის ავტორია ქართული მუსიკის ისტორიაში ყველაზე დიდი გენიოსი.

ტექსტი:
დაიგვიანეს, ჯერ არსად სჩანან!
მაგრამ სალამურს თუ მოჰკრა ყური,
ანდამატურის ძალით გამოსწევს
აქეთკენ მის გულს ხმა უცნაური.

ვინ ქვაბულიძე და ვინ მეცხვარე?!
იქ, ბარში, ყველა ჩემი ტოლები
მტრებში ვეფხვივით დანავარდობენ
და მე კი ცხვარში აქ ვიმალები!

ისინი მტრის სისხლს ჰღვრიან უწყალოდ,
ზიზღით ევსებათ მრისხანე გული,
მე კი ქალივით აქ ცრემლებს ვაფრქვევ
და სიყვარულით მიძგერს გლახ-გული!..
მერე როგორ დროს? მაშინ, როდესაც
სხვა უდიდესი წინ გვიძევს ვალი!

მაგრამ ეს მოხდა ჩემს უნებურად,
გულთამხილავო, და არ მაქვს ბრალი!..
კიდევ არ სჩანან... ეგებ წავიდენ,
გაიარეს და ვერ მოვკარ თვალი?
აჰ, ღმერთო ჩემო! ჯერ უმისოდაც
დაბნეული მაქვს მე გზა და კვალი!

დასაკრავი სია: კლასიკური ვოკალური