اتفضل القهوة محمود اليماني

قالتلي اتفضل القهوة
ومدت ايدها بالفنجان
جميلة القهوة بايديها
ومن يومها وانا سكران

جابتلي القهوة بايديها
وشوق الدنيا في عنيها
ومدت ايدها بالفنجان
محستش بمرار فيها

فحسيت انجذاب الروح
ولمعة عيني عالسيرة
وبصتها علي الفنجان
تحس مابينهم الغيرة

بقيتي بتحضري فجأة
ولا عمرك هتنسيني
هسيبلة كل يوم جملة
وكل منام تقابليني

ويفضل رمشك الشاهد علي الحداث
في وقت ما وقفت الساعة مع النهايات
عقارب كون توقفها بكل هدوء
كفيلة تخلي ايدك تجري بالكتابات

ودبت روح في ليل بارد
كفيلة تحولك هارب
كفيلة تغيرك اعمي
واعزل وانت بتحارب

وساذج مع مرور الوقت
وتقل الرجل في الخطوة
عقارب كون توقفها
وليها علي الزمن سطوة

وليها علي اللي فيك علامات
وليها من ايديك كتابات
وهي صاحبة البصمة
حاجات عاشت وقلبك مات

ومدت ايدها بالفنجان
وطلبت من مرة كمان
اطفي سيجارتي قدامها
عشان بتكح من الدخان

وليها علي الغضب خازن
وليها في الزعل متاهات
عقارب كون تحركها
تعيد في مشاهد النهايات

تزور البال بلعب عيال
بضحكة طفل وبراءته
يشد القلب من التاجي
ويسكن فيه يكون نبضه

وتلعب لعبة النسيان
وتخرج منها مش كسبان
وتفضل برده مستني
تمد ايديها بالفنجان

وليها علي الغضب خازن
وليها في الزعل متاهات
عقارب كون تحركها
تعيد في مشاهد النهايات

تزور البال بلعب عيال
بضكة طفل وبراءته
يشد القلب من التاجي
ويسكن فيه يكون نبضه

محمود اليماني