საქართველო-საბერძნეთი - 4:2! 26 მარტს ეროვნული საფეხბურთო ნაკრები ევრომასტერსზე გავიდა. 27. 03. 2024

რუსთავი-2. კურიერი. 27. 03. 2024 (09:00)
წამყვანი ანუკა ქინქლაძე
(შემოკლებით)

2024 წლის 26 მარტს საქართველოს ეროვნულმა საფეხბურთო ნაკრებმა პენალტების სერიაში 4:2 დაამარცხა საბერძნეთის ნაკრები და არსებობის ისტორიაში პირველად გავიდა ევროპის საფეხბურთო ჩემპიონატზე, რომელიც გაიმართება გერმანიაში 2024 წლის ზაფხულში. ეს ასევე იყო ჩვენი ნაკრების პირველი პენალტების სერია ისტორიაში.
მატჩი „დინამო-არენაზე“ დაიწყო თბილისის დროით 21 საათზე. ძირითადი და დამატებითი ტაიმები გოლის გარეშე დასრულდა. მატჩის ბედი პენალტებმა გადაწყვიტა.
გადამწყვეტი პენალტი გაიტანა 31 წლის ნახევარმცველმა ნიკა კვეკვესკირმა, რომელიც გალიდან დევნილია და 2015 წლიდან იცავს ეროვნული ნაკრების ღირსებას.
ნაკრების სასტარტო შემადგენლობა:
გიორგი მამარდაშვილი, ლაშა დვალი, სოლომონ კვერკველია, გურამ კაშია, ლევან შენგელია, ოთარ კაკაბაძე, ოთარ კიტეიშვილი, გიორგი ჩაკვეტაძე, გიორგი ქოჩორაშვილი, ხვიჩა კვარაცხელია, ბუდუ ზივზივაძე.
გუნდის მთავარი მწვრთნელი ვილი სანიოლი (საფრანგეთი)

ევროპის ჩემპიონატზე საქართველოს ნაკრები ითამაშებს F ჯგუფში, სადაც მისი მოწინააღმდეგეები იქნებიან თურქეთის , ჩეხეთის და პორტუგალიის გუნდები.
შესარჩევი ტური:
18 ივნისი - საქართველო-თურქეთი
22 ივნისი - საქართველო-ჩეხეთი
26 ივნისი - საქართველო-პორტუგალია

დამატებით:
კარგ ხალხში, ქვეყანასა და პროფესიონალებში მოვხვდი, აქ მუშაობა მიხარია - ვილი სანიოლი. 27. 03. 2024
"ბევრი ფიქრობდა, რომ მთავარი მწვრთნელის თანამდებობიდან უნდა წავსულიყავი, არც ახლა ვფიქრობ წასვლაზე, რადგან კარგ ხალხში, ქვეყანასა და პროფესიონალებში მოვხვდი, აქ მუშაობა მიხარია, - ამის შესახებ საქართველოს ეროვნული საფეხბურთო ნაკრების მთავარმა მწვრთნელმა, ვილი სანიოლმა პრესკონფერენციაზე განაცხადა.
"რა შეგრძნება მაქვს, რომ ასეთი შედეგს მივაღწიეთ? სასიხარულოა, როცა შედეგს იღებ, მაგრამ გჭირდება დიდი მოთმინება და იმედი. საქმე ხან გამოდის, ხან - არა, მოთმინება ამიტომაა საჭირო.
მწვრთნელის წარმატება ფეხბურთელის მიღწევისგან განსხვავებულია. ფეხბურთელი პასუხს საკუთარ თამაშზე აგებს, მწვრთნელი კი გუნდის შედეგზე. ეს სულ სხვა შეგრძნებაა, რაც დიდ შრომას მოაქვს. პენალტებზე ბევრი ვივარჯიშეთ. როდესაც სერია იწყებოდა, უნდა შეგვერჩია, ვინ დაარტყამდა, ფეხბურთელებს გავესაუბრე და პირველი პენალტის შესრულება ქოჩორაშვილმა ისურვა. ის დიდი ხანია არაა, რაც ნაკრებში თამაშობს, მაგრამ ისეთი შეგრძნება მაქვს, თითქოს წლებია, გუნდის წევრია. იგივე დვალი, რომელმაც ისე კარგად შეასრულა პენალტი. არავის გამოყოფა არ მსურს, დღეს ყველამ ფანტასტიკურად ითამაშა“, - განაცხადა ვილი სანიოლმა.
https://rustavi2.ge/ka/news/278503

დასაკრავი სია: აპოლიტიკური ამბები მედიიდან და სოცქსელებიდან