Македонија се крена на нозе за 14-годишното девојче кое се изгуби во Центарот на Скопје.

Македонија се крена на нозе за 14-годишното девојче кое се изгуби во Центарот на Скопје. Трет ден полицијата е постојано на терен и се преземаат интензивни мерки и активности. Засега нема нови информации за истрагата. Прва детска амбасада Меѓаши / First Children's Embassy Megjashi преку меѓународна соработка ги алармира сите земји за девојчето. Но, родителите стравуваат и воедно се прашуваат како да ги заштитиме децата…
Трет ден потрага по исчезнатата Вања. Сè уште ни трага, ни глас од тинејџерката. Граѓаните на нозе, родителите во шок, децата вознемирени. Плакати со нејзиниот лик залепени низ центарот, апел кој ќе ја забележи да даде точна информација на надлежните органи. Полицијата распиша потера, интензивно се бара 14-годишното девојче кое исчезна на патот од дома кон училиштето.
Сигналот на нејзиниот телефон се губи на „Партизанска“, спроти Универзална сала. Освен полициските тимови, и ловџиите се вклучија во оваа потрага. Потребна е брза интервенција на Министерството за внатрешни работи, велат од Првата детска амбасада „Меѓаши“. И тие во акција.
Во училиштата недостигаат превентивни програми, децата да препознаат несоодветно однесување на возрасните и да бидат внимателни при стапување во контакт, за да не најдат во ситуација да бидат изманипулирани.
На сајтот на МВР сè уште се активни потраги по шест деца кои исчезнаа изминативе години.
Родителите да внимаваат на своите деца, особено на комуникацијата на социјалните мрежи што ја воспоставуваат со непознати лица – велат психолозите. Неопходно е државата да почне да презема мерки бидејќи менталното здравје на младите е многу загрозено во нашето општество, вели психотерапевтот Емилија Бошковска. Исчезнувањето на малолетници дополнително влијае на нив.
Младите имаат потреба од блискост и пријателства и доколку тоа не го добијат во реалниот живот, чаре бараат на социјалните медиуми и се изложуваат на многу непријатности.
Ана Јосифоска-Тодровска