Pesei - Paghei - Pichei

“Pesei, Paghei, Pichei”: on mesajo de on Veneto stufo, incavolà ma mai rasegnà.
Propio cusì finise la scrita ke xe riportà so la targa in marmo inaugurà poco tenpo fa a Tezze sul Brenta (VI). I ne sta cavando la storia e le tradisión, la lengoa e la anema, e deso dovemo dire basta: xe sto ki el senso de quanto ke se pol lexare in te la entrata del novo munisipio de Tezze.
El sindaco Luciano Lago co sta nova inisiativa el ga dà voxe a on Popolo Veneto ke no se arende e ke vol dire de no contro tuti i sopruxi ke el xe costreto a subire ogni dì: i ne scancela la cultura, se ne rendemo conto? I ne cava le feste, i costumi e le tradisión, se ne rendemo conto? I ne sconde e i ne inbroja la nostra glorioxa storia veneta, se ne rendemo conto? Finalmente la risposta xe SÌ, scomisiemo a rendarse conto e no semo pì disposti a rinunciare a quelo ke semo; ansi, volemo tutelare e valorixare tuto quelo ke fa parte dela nostra cultura veneta, sensa pì subire pasivamente.
Xe rivà on mucio de xente par la inaugurasión del munisipio e dela targa e tuti i se fermava a lexare sto mesajo tanto ciàro quanto, da on serto ponto de vista, “rivolusionario”: pari e mari ke i lexeva insieme ai so fioi el testo ke, in lengoa veneta, el ne spiega in ke situasión semo ormai costreti a vivare.