Top News - Bursa fiktive, tre në pranga në Tiranë

Mashtrimi nëpërmjet bursave fiktive vijon të çojë në pranga të rinj shqiptarë.
Policia e Tiranës ka njoftuar këtë të mërkurë arrestimin e tre shtetasve, mes të cilëve administratori i një Call Center në Tiranë dhe dy operatorë në këtë subjekt.
Ata prezantoheshin si agjentë shitje dhe i bindin të huajt përmes telefonit të investonin në bursën fiktive Forex.
Në kërkim është shpallur pronari i subjektit me inicialet A.T, 34 vjeç, ku u finalizua operacioni nga uniformat blu, ndërsa janë sekuestruar 4 njësi kompjuterike, aparate celulare dhe lista me të dhëna të ndryshme të shtetasve të huaj që dyshohet se janë mashtruar, për të investuar në bursa fiktive.
Operacioni “Last Call” u organizua nga specialistët e Seksionit për Hetimin e Krimeve Ekonomike dhe Financiare, në DVP Tiranë, nën drejtimin e Prokurorisë.
Në kuadër të këtij operacioni u bë arrestimi në flagrancë i shtetasve:
– D. T., 35 vjeç, banues në Tiranë, administrator i një subjekti call center;
– E. Ll., 28 vjeç dhe E. A., 23 vjeçe, të dy banues në Tiranë, të punësuar si operatorë në këtë subjekt.