21 رمضان شريف حضرت علي عليه السلام جي شھادت جي ڏينهن جي حوالي سان ضابطه اخلاق تي مڪمل عملدرآمد

وڳڻ رپورٽ عاشق علي مغيري

وڳڻ، ڊپٽي ڪمشنر قمبر شهدادڪوٽ جاويد نبي کوسو چيو آهي ته 21 رمضان شريف حضرت علي عليه السلام جي شھادت جي ڏينهن جي حوالي سان ضابطه اخلاق تي مڪمل عملدرآمد ڪرڻ سان گڏ اسٽريٽ لائيٽنگ، پيئڻ جو صاف پاڻي، صفائي سٿرائي، بجلي سميت سڪيورٽي کي هاءِ الرٽ رکيو وڃي ۽ جن حساس علائقن ۾ پوليس جي نفري گھٽ آهي اتي فوري طور تي نفري وڌائي ۽ امن و امان جي صورتحال کي بهتر بڻايو وڃي ۽ ضلعي اندر امن امان جي فضا کي قائم رکڻ ۾ مختلف مڪتب فڪر جي عالمن سڳورن جو هميشه مثبت ۽ اهم ڪردار رهيو آهي هن اهڙن خيالن جو اظهار ڊي سي آفيس قمبر درٻار هال ۾21 رمضان شريف حضرت علي عليه السلام جي شھادت جي ڏينهن جي تيارين جي سلسلي ۾ هڪ اهم اجلاس جي صدارت ڪندي ڪيو ان موقعي تي ڊي سي قمبر شهدادڪوٽ صحت کاتي جي عملدارن کي هدايتون جاري ڪندي چيو ته 21 رمضان شريف حضرت علي عليه السلام جي شھادت جو ڏينهن آهي ان دوران ڊاڪٽرن ۽ عملي جون ايمرجنسي ڊيوٽي لڳائي 24 ڪلاڪ سندن جي موجودگي کي يقيني بڻايو وڃي ان موقعي تي ڊپٽي ڪمشنر چيو ته صفائي سٿرائي، بجلي، پاڻي يا ٻي ڪا به شڪايت هجي ته پنهنجن پنهنجن تعلقن جي اسسٽنٽ ڪمشنرن سان رابطو ڪري انهن کي حل ڪرايو وڃي ھن وڌيڪ چيو ته مجلسن ۽ جلوسن دوران شڪي ماڻهن تي ڪڙي نظر رکي وڃي ۽ اهڙو اطلاع ضلعي انتظاميه، رينجرز يا پوليس کي فوري طور تي ڏنو وڃي. اجلاس ۾ مختلف مڪتب فڪر جي عالمن سڳورن پاران پنهنجا پنهنجا مسئلا پڻ پيش ڪيا ويا ڊي سي قمبر شهدادڪوٽ سمورن جائز مسئلن جي فوري حل لاءِ هدايتون پڻ جاري ڪيون ويون ان موقعي تي ايس ايس پي قمبر شهدادڪوٽ بشير احمد بروهي چيو ته اسان جا جوان هر وقت الرٽ آهن دشمن جي ڪنهن به سازش کي ڪامياب ٿيڻ نه ڏينداسين، ان حوالي سان داخلي ۽ خارجي رستن تي غير معمولي سڪيورٽي جا انتظام پڻ سخت ڪيا ويا آهن ۽ ضلعي اندر امن امان کي برقرار رکڻ لاءِ ضلعي جي سڀني کي پنهنجو پنهنجو ڪردار ادا ڪرڻو آهي. هن چيو ته 21 رمضان شريف حضرت علي عليه السلام جي شھادت جي ڏينهن دوران ضابطه اخلاق ۽ نيشنل ايڪشن پلان تي عملدرآمد ڪرايو ويندو ۽ ڪنهن کي به قانون هٿ ۾ کڻڻ جي اجازت هرگز نه ڏني ويندي ۽ سڀني جي جائز مسئلن کي فوري طور تي حل ڪيو ويندو. ان موقعي تي ممتاز ڊي ايس آر رينجرز، پوليس ۽ ضلعي جي سمورن اسسٽنٽ ڪمشنرن، ٻين لاڳاپيل آفيسرن، مختلف مڪتب فڪر سان تعلق رکندڙ عالمن سڳورن ۽ قانون لاڳو ڪندڙ ادارن جي آفيسرن پڻ شرڪت ڪئي.